काठमाडौं । शैक्षिक संस्था बन्द गर्ने नगर्ने भन्ने निर्णय अवस्था विश्लेषण पछि मात्रै हुने भन्दै स्वास्थ्य मन्त्रालयले अहिलेलाई जनस्वास्थयका मापदण्ड गम्भिरतापूर्वक पालना तर्फ ध्यान दिन आग्रह गरेको छ ।

कोरोना भाईरस (कोभिड-१९) को दोश्रो लहरको त्रास बढेसँगै शैक्षिक संस्था बन्द हुने वा नहुने भन्ने हल्लाबीच स्वास्थ्य तथा जनसंख्या मन्त्रालयका प्रवक्ता प्रा.डा. जागेश्वर गौतमले उक्त कुरा स्पष्ट पारेका हुन् ।

महामारीको अवस्थाबारे शैक्षिक संस्थाहरुले आफैं पनि गम्भीरतापूर्वक कुरा बुझ्न जरुरी रहेको बताए । यद्यपि अवस्था गम्भीर भएमा विद्यालय बन्द गर्न सकिने स्वास्थ्य मन्त्रालयले जनाएको छ ।

विद्यालय सञ्चालन गर्दा भिडभाड नगरी गर्न तथा सरकारले जारी गरेको जनस्वास्थ्यका मापदण्ड कडाईका साथ पालना गर्न उनले आग्रह गरे ।

पछिल्लो समय छिमेकी भारतमा संक्रमण बढेसँगै नेपालमा हुने जोखिमलाई ध्यान दिदैं सरकारले गत आईतबार देशभर सभा, जुलुस, भेला, जमघट, गोष्ठि, सेमिनार, बैठक, भिडभाड हुने व्यवसाय र कार्य नगर्न सूचना सार्वजनिक गरेको छ ।

सामाजिक भौतिक दुरी कायम गर्न तथा हात धुने वा सेनिटाईज प्रयोग तथा मास्कको अनिवार्य प्रयोगमा ध्यान दिन सरकारले भनेको छ ।