☰
काठमाडौं । नेकपा एमालेका महासचिव इश्वर पोखरेलले अनुशासन उलंघनमा माधवकुमार नेपाललाई पार्टीको वरिष्ठ नेता नरहेको जानकारी दिँदै १० बुँदे स्पष्टिकरण मागेको छ । केन्द्रीय कमिटीको निर्णयअनुसार नेपाललाई महाधिवेशन आयोजक समिति सदस्यका रुपमा सम्बोधन गर्दै तीन दिनभित्र जवाफ दिने गरी स्पष्टिकरण मागिएको हो ।
पार्टी केन्द्रीय कमिटीको बैठकको निर्णय अनुसार महासचिव पोखरेलले सोधेको स्पष्टिकरणमा कानुनविपरित सडकबाट अध्यक्ष केपी शर्मा ओलीलाई नेकपाको अध्यक्ष र साधारण सदस्य समेतबाट के आधारमा निष्कासन गरेको भनेर जवाफ मागिएको छ ।
यस्तो छ स्पष्टिकरणपत्र :
तपाईं माधवकुमार नेपालले हाम्रो पार्टी विधानविपरीत पार्टी तथा नेतृत्वको सरकारविरुद्ध देहाय बमोजिमका क्रियाकलापहरुमा नेतृत्व र अगुवाई के कति कारणले गर्नुभएको हो ?
१. तपाईले सावित नेपाल कम्युनिष्ट पार्टी (नेकपा) को वरिष्ठ नेताको जिम्मेवारीमा रहँदाको अवस्थामा पार्ट अध्यक्ष केपी शर्मा ओलीका विरुद्धमा ‘१९ पृष्ठ लामो अराजनीतिक, तथ्यहीन र शत्रुतापुर्ण आरोप’ तयार पार्न, पार्टी विधानको व्यवस्था विपरीत छापामार शैलीमा तात्कालीन पार्टी सचिवालयमा प्रस्तुत गर्न र त्यसलाई पार्टीको नाम, झण्डा र लोगोसमेतको अनाधिकृत रुपमा प्रयोग गरी पुस्तकाकारमा प्रकाशित गरेर बितरण गर्नमा अग्रसर भई पुष्पकमल दाहालको मतियार समेत भई पार्टी हित बिपरित कार्य गरेको र गराउनु पर्नाको कारण के हो ?
२. नेपाल कम्युनिष्ट पार्टी (नेकपा) को बिधानबिपरित सडक तथा अनाधिकृत स्थानमा बसी अनाधिकृत र कानून बिपरित पार्टी अध्यक्ष केपी शर्मा ओलीलाई पार्टी अध्यक्ष र साधरण सदस्यसमेतबाट के–कुन आधारमा सडकबाटै कथित निष्कासनको निर्णय गर्नु/गराउनु भएको हो ?
३. निर्वाचन आयोगमा पार्ट विधान र हित विपरित पटक–पटक तपाई र तपाईसमेत भई विभिन्न प्रकारका निवेदनहरु के कति कारणले गर्नू/गराउनु भएको हो ?
४. पार्टी फुटाउने उदेश्यले पार्टीको नाम, चिन्ह र भण्डासमेत कुनै एउटा समुह वा गुटले मात्र प्रयोग गर्ने/गराउने उदेश्यका साथ विभिन्न किथत निवेदन लिई निर्वाचन आयोगमा पटक–पटक किन जानु भएको हो ? र, पार्टी फुटाउँदा के–कुन उदेश्य हासिल हुने हो ?
५. पार्टी अध्यक्ष र महासचिवद्वारा मिति २०७७ चैत ४ गते गरिएको मौीखक तथा लिखित निर्देशनको अवज्ञा गरी पार्टीको नाम, चिन्ह र झण्डाको दुरुपयोग गरी मिति २०७७ चैत ४ र ५ गते कथित राष्ट्रिय भेला गरेको, विभिन्न अन्य भेलाहरु निरन्तर गरिरहेको, बिभिन्न पार्टी कमिटी तथा भातृ संगठनहरुको भेला गरी अनाधिकृत रुपले बिभिन्न कार्य गरी/गराई पार्टी फुटाउन नेतृत्व र अगुवाई किन गर्नुभएको हो ?
६.तपाई आफ्नै पार्टी अध्यक्ष कमरेड केपी शर्मा ओलीले नेतृत्व गरेको लोकप्रिय सरकारका बिरुद्ध संसद, सञ्चार माध्यम र सडकबाट निरन्तर बिरोध गरेको र आफ्नै सरकारका विरुद्ध आफ्नो दलका नेता एवं प्रधानमन्त्रीलाई थाहै नदिइ छापामार शैलीमा अविश्वासको प्रस्ताव तयार गरेको, प्रतिनिधिसभाका कतिपय माननीय सदस्यहरुको फर्जी हस्ताक्षर समेत गरी मिति २०७७ पुस ५ गते संसद सचिवालयमा अविश्वसको प्रस्ताव दर्ता गर्ने प्रयाश गरेको जस्तो गर्नै नहुने अत्यन्तै हानिकारक र अनुशासनहीन काम किन गर्नुभयो ?
७.सम्मानीत सर्वाेच्च अदालतको मिति २०७७ फागुन २३ गतेको फैसलापछि नेपाल कम्युनिष्ट पार्टी (एमाले) को केन्द्रीय कमिटीको दसौं, एघारौं र बाह्रौ बैठक र संसदीय दलको बैठकहरुमा समेत उपस्थित हुनुको साटो पार्टीको बिधान र निर्देशनविपरीत पार्टी रु जनसंगठनहरुको नाम, झण्डा र चिन्हको दुरुप्योग गरी समानान्त्र संगठन निर्माण गर्ने र कथित राष्ट्रिय कार्यकर्ता भेला तथा बिभिन्न नामका कथित भेलाहरु आयोजना गर्नु र पार्टी र पार्टीको एकताबिरोधी प्रस्ताव प्रस्तुत एवं पारित गर्नु/गराउनुको उदेश्य के हो ?
८. विपक्षी राजनीतिक दलहरुसँग गठबन्धन गरी आफ्नो पार्टीको अध्यक्ष एवं दलका नेता केपी शर्मा ओली नेतृत्वको सरकार गिराउन र अन्य राजनीतिक पार्टीको नेताहरुलाई प्रधानमन्त्री बनाउन षडयन्त्र गर्नुको कारण के हो ?
९. माधव नेपालहरु सके एमाले कब्ज गरेर, नसके बिद्राहे गरेर नेकपा –माओवादी केन्द्र) सँग एकता गर्न आउनु हुन्छ भन्ने पुष्पकमल दाहालका सार्वजनिक भनाईहरुप्रति तपाईको मौन समर्थन रहनुको रहष्य वा कारण के हो ? यसबीचमा पनि पुष्पकमल दाहालसँगको निरन्तर भेटघाट जारी रहनुको अर्थ के हो ?
१०. माथि उल्लेखति क्रियाकलापहरुका साथै तपाईले पार्टी हित विपरीत पार्टीको बैधानिक ब्यवस्था र कार्यक्रमको विपक्षमा सार्वजनिक क्रियाकलाप गरेको, पार्टी बिधान तथा निर्णयविपरीत गुटबन्द तथा षडयन्त्र गरेको, पार्टी निर्णय बारम्बार उलंघन गरेको, पार्टीप्रतिको निष्ठा र बिश्वस नरहने गरी भ्रम फैलाई स्वयं पार्टी प्रतिको निष्ठा र विश्वसबाट च्यूत भएको, पार्टीको प्रतिष्ठा र मर्यादामा आँच आउने गरी निरन्तर बिभिन्न क्रियाकलापहरु सञ्चालन गरे/गराएको, पार्टी कमिटीको गोपनीयता भंग गरे/गराएको, पार्टीद्वारा सञ्चालित आन्दोलनको बिपक्षमा रहेको वा बिपक्षीसँग साँठगाँठ गरे/गराएको, केन्द्रीय जनप्रतिनिधि संस्थालगयत पार्टीले पठाएको जिम्मेवारीमा रहँदा पार्टी निर्णय र निर्देशनविपरीत विभिन्न कार्यहरु निरन्तर गरिरहेको/गराईरहेको र यस्ता अवाञ्छित क्रियाकलापहरुमा पार्टीको जिम्मेवार व्यक्तिहरुलाई सम्मिलित गराएको/उक्साएको, अवाञ्छित तत्वसँग साँठगाँठ गरी राष्ट्रहितबिपरित काम गरे/गराएको, पार्टीको विधान र नियमावलीमा पार्टी सदस्य वा पार्टी कमिटीहरुले पालना गर्नूपर्ने भनी उल्लिखत कर्तब्यको उलंघन गरे/गराएको समेत प्रष्ट देखिएकोले यस्तो क्रियाकलाप निरन्तर गरी/गराई पार्टी हितविपरीत, पार्टीको एकता, अक्षुण्णता र अग्रगामी कार्यको बिरुद्ध, पार्टीले राष्ट्रहित तथा जनहितका लागि गरिरहेको र गर्नूपर्ने कार्यलाई रोक्ने र पार्टी जीवन तथा समग्र पार्टीमाथि नै आँच आउने गरी पार्टीलाई बिभाजनको दिशामा लाग यस्ता बिभिन्न अनुचित क्रियाकलापहरु गरे/गराईएकोले त्यस्ता बिभिन्न क्रियाकलापहरु के–कति कारणले निरन्तर गर्नु/गराउनु भएको हो ?
मिति २०७७ चैत ७ गते सम्पन्न नेपाल कम्युनिष्ट पार्टी (एमाले) केन्द्रीय कमिटीको बाह्रौं बैठकको निर्णय बमोजिम माथी उल्लिखित विषयहरुमा तपाईले पार्टी विधानको धारा ४९ (क) को १, २, ३, ४, ५, ६, ७ ९, १० र १४ को उल्लंघन गरेको सप्रमाण देखिएकोले तपाईलाई पार्टी विधान बमोजिम कारवाही किन नगर्ने ? यस सम्बन्धमा माथि उल्लेखित सबै विषयहरुमा स्पष्ट पार्न तपाईलाई तीन दिनको समय दिईएको छ । तीन दिनभित्र स्पष्टीकरण सहित लिखित जवाफ प्रस्तुत नगरेमा पार्टीको विधान र नियमावली बमोजिम कारवाही हुने व्यहोरा अवगत गराईन्छ ।
ईश्वर पोखरेल
महासचिव
