काठमाडौं । उपप्रधानमन्त्री तथा नेकपा (एमाले) का महासचिव ईश्वर पोखरेलले सबैले तिक्ततालाई विर्सेर पार्टीलाई एकतावद्ध बनाउने काममा लाग्नुपर्ने बताएका छन् ।
पोखरेलले विश्वभर फैलिरहेका पार्टी सम्वद्ध प्रवासी नेपाली मञ्चको आइतबार आयोजित भेलालाई सम्वोधन गर्दै वाधा अड्चन पन्छाउदैं उत्साहकासाथ पार्टी कामलाई व्यवस्थित गर्न निर्देशन दिए ।

विगतमा अनेकन बाधा , अड्चन र चुनौती परास्त गर्दै नेपालको कम्युनिष्ट आन्दोलन यहाँसम्म आइपुगेको सन्दर्भ उल्लेख गर्दै महासचिव पोखरेलले आउने दिनमा पनि चुनौतीलाई परास्त गर्दै अगाडि जाने कुरामा उत्साहकासाथ अघि बढ्न प्रवास सम्वद्ध पंक्तिलाई आह्वान गरे ।

“हामी सजिलै यहाँसम्म आइपुगेका होइनौं, कम्युनिष्ट आन्दोलनभित्र अनेकन घात प्रतिघात, टुटफुटको शृङ्खला व्यहोर्दै आएका हौं” महासचिव पोखरेलले भने , “बदलिएको सन्दर्भमा अब तपाईहरु सवै उत्साहकासाथ विगतका तितामिठा सन्दर्भलाई विर्सेर सबैलाई समेट्दै अगाडि बढ्नुपर्छ ।”