अमेरिकाका निवर्तमान राष्ट्रपति डोनल्ड ट्रम्पले राष्ट्रपतिको कार्यभार सम्हाल्दा उनको आर्थिक आय जति थियो, उनको कार्यकाल सकिदा त्यसमा निकै कमी हुन आएको ब्लुमबर्गले खुलासा गरेको छ । कोभिड–१९ महामारीले उनको सम्पत्तिमा भारी नोक्सान पुर्याएपछि हाल ट्रम्पको कुल सम्पत्तिमा ७० करोड डलर घाटा लाग्न पुगेको छ । कोरोना महामारीको अस्तित्व अस्वीकार गर्दै आएका ट्रम्पको कार्यालय भवनहरु, ब्रान्डेड होटेल, रिसोर्ट सबैको आम्दानीमा ठूलो असर पुगेकाके थियो ।

मूल्यमा गिरावट आएपछि उनका होटेल तथा रेष्टुराँ टाट पल्टिएका थिए । यस अतिरिक्त उनको स्वामित्व अन्तर्गत रहेका विमानहरुले पनि कमाइ गर्न सकिरहेका थिएनन् । त्यसो त ट्रम्पले सरकारलाई दिनुपर्ने राजस्वमा पारदर्शी नरहुने गरेको उनी निकट संस्थाहरुले भन्ने गरिरहेका छन् । यसलाई लिएर ट्रम्पको आर्थिक मामला तथा उनको पारिवारिक व्यवसायका बारेमा अनुसन्धान भैरहेको छ ।

ब्लुमबर्गले निकै लगानी तथा मेहनत गरेर ट्रम्प राष्ट्रपति हुनुअघि र पछिको अवस्थामा उनको सम्पत्तिको खोजी गरेको थियो । सन् २०१६ मेदेखि जनवरी २०२१ बीचका उनका सबै वित्तीय कागजातको अध्ययन र विश्लेषण गरेपछि उनी घाटामा रहेको तथ्य खुलेको हो । ट्रम्पको सबैभन्दा मुनाफा हुने भनेको व्यावसायिक घरजग्गा कारोवार हो । यो उनको कूल सम्पत्तिको तीनचौथाइ हिस्सा पनि हो ।

हाल उनीसँग रहेको अफिस टावरलगायत भवनहरु सबैको मूल्यमा भारी मात्रामा गिरावट आएको छ । ब्लुमबर्गले गरेको आँकलनमा ट्रम्पको मुख्य व्यावसायिक सम्पत्तिको मूल्य २६ प्रतिशतले घटेको हुनसक्छ । यो आर्थिक रुपमा ट्रम्पका लागि निकै ठूलो धक्का हो । ट्रम्प स्वयम्ले ब्रान्डेड होटेल, रिसोर्टसहित १९ वटा गल्फ कोर्सहरु पनि सञ्चालन गरिरहेका छन् ।

अमेरिकी संसदमाथि भएको हमलापछि अमेरिकाको प्रोफेसनल गल्फर्स एसोसिएसन (पीजीए)ले ट्रम्पको न्यु जर्सी गल्फ कोर्समा आयोजना गर्ने भनेको २०२२ गल्फ च्याम्पियनसिप टुर्नामेन्टको सम्झौता रद्द गरेको छ । १९९० को दशकमा कंगाल हुँदा ट्रम्पलाई ऋण दिन तयार एक मात्र बैंकले पनि अब उनीसँग आर्थिक कारोबार नगर्ने बताएको छ । ट्रम्पको नाममा रहेका बोइङ ७५७ सहितका थुप्रै विमान दशकौं पुराना भैसकेका छन् ।

ट्रम्पले गुमाएको सम्पत्ति मिडियासँग ठूला सम्झौता गरेर अनि आत्मकथा लेखेर किताब बिक्रिबाट फिर्ता लिन सक्ने छन् । यसअघि, बाराक र मिसेल ओबामाले आफ्नो आत्मकथा किताबका लागि ६ करोड ५० लाख डलर प्राप्त गरेका थिए । बिल क्लिन्टनले २००४ को किताबका लागि एड्भान्समै एक करोड ५० लाख डलर पाएका थिए ।

ब्लुमबर्गको रिपोर्टमा भने ट्रम्पले राष्ट्रपति पदपश्चात् आफ्नै समाचार च्यानल या सोसल मिडिया प्लेटफर्म खोलेर सबैभन्दा धेरै लाभ उठाउन सक्ने उल्लेख गरिएको छ । जुन उनलाई २०२० मा मत हाल्ने सात करोड ४० लाख मतदाताका लागि आकर्षक हुनसक्छ । उनको कुल सम्पत्ति अहिले २.३ अर्ब डलर रहेको छ ।

(एजेन्सीको सहयोगमा)