उत्तर कोरियाली नेता किम जोङ उनकी बहिनी किम यो जोङले अमेरिकालाई ‘दुर्गन्ध नफैलाउन’ भन्दै चेतावनी दिएकी छिन् ।

अमेरिकी अधिकारीहरु दक्षिण कोरियाको भ्रमणमा आउनु एक दिन अघि जोङको यस्तो प्रतिक्रिया आएको हो । अमेरिकी राष्ट्रपति जो बाइडेनले उत्तर कोरियाबारे आफ्नो नीति सार्वजिनक गर्ने तयारी गरिरहँदा उत्तर कोरियालबाट आएको चेतावनीलाई गम्भीर रुपमा लिइएको छ। जोङले अमेरिका र दक्षिण कोरियाबीच भएको संयुक्त सैन्य अभ्यासको समेत आलोचना गरेकी छिन् ।

जो बाइडेन राष्ट्रपतिमा निर्वाचित भएसँगै अमेरिकाले उत्तर कोरियासँग कयौं पटक वार्ताको लागि प्रयास गरिरहेको छ । तर, उत्तर कोरियाबाट अमेरिकी अधिकारीहरुले कुनै जवाफ पाएका छैनन् ।

रोङोङ सिन्मून अखबारमा छापिएको समाचारमा दक्षिण कोरियालाई लक्षित गर्दै समुद्र पारिबाट उत्तर कोरियाली भूमिमा बारुदको गन्ध फैलाउन अमेरिकाको नयाँ प्रशासनले संघर्ष गरिरहेको आरोप उनले लगाएकी छिन् । उनले बाइडेन प्रशासनलाई आफ्नो ४ वर्ष कार्यकालभर शान्तिपूर्वक बस्ने इच्छा भए दुर्गन्ध फैलाउने कामबाट पछि हट्न समेत चेतावनी दिएकी छिन् ।