काठमाडौं । भारतीय विदेशमन्त्री एस जयशंकरले चीनले बन्दुक देखाए आफ्नो देशले पनि बन्दुक नै देखाउने चेतावनी दिएका छन् । चेन्नईमा आयोजित इन्डिया–टुडे कन्क्लेभमा जयशंकरले चीनले आफूहरूलाई बन्दुक देखाए जवाफमा भारतले पनि बन्दुक नै देखाउने चेतावनी दिएका हुन् । चीनले अमेरिका सहित चार राष्ट्रहरुको क्वार्ड बैठकको आलोचना गरिरहेका बेला भारतीय जयशंकरको यस्तो चेतावनी आएको छ ।

उनले विश्वशक्तिका रूपमा उदाउँदै गरेको भारतका लागि आगामी दिनहरू चुनौतीपूर्ण रहेको र त्यस्ता चुनौती सामना गर्न वर्तमान राजनीतिक सक्षम रहेको दाबी गरे । जयशंकरले एउटा विश्वशक्तिका रूपमा चीनको उदयलाई दोस्रो युद्धपछिकै असाधारण घटना भएको समेत बताए ।

उनले चीनको उदयको प्रभाव छिमेकी भएकाले भारत र अन्य छेउछाउका मुलुकमा पर्नु स्वाभाविक रहेको समेत उल्लेख गरे । ‘विश्व शक्तिको उदयको प्रभाव त्यसको छेउछाउमा परिहाल्छ र हामीले पनि त्यो प्रत्यक्ष अनुभव गरेका छौं,’ जयंशकरले भने । त्यसमाथि भारत र चीनबिच सीमा लगायत अन्य मुद्दाहरू पनि रहेका हुँदा बढी प्रभाव देखिनु स्वाभाविक रहेको जयंशकरको भनाइ थियो । जयशंकरले भारतका लागि चीनसँगको सम्बन्ध सही दिशामा अगाडि बढाउन चुनौती रहेको समेत संकेत गरे । ‘दुई देशबिचको सम्बन्धमा चीनले गर्ने व्यवहारमा निर्भर गर्छ ।

यदि उसले हात बढाउँछ भने हामी पनि हात बढाउँछौं,’ पछिल्लो एक वर्ष यता चीनसँगको सम्बन्धमा देखिएको उतारचढावतर्फ संकेत गर्दै उनले भने । गत वैशाखमा उत्तरी लद्दाखको सीमावर्ती गलवान क्षेत्रमा भएको हिंसात्मक झडपका कारण दुवै देशबिचको सम्बन्ध निकै तनावपूर्ण रहँदै आएको थियो । उच्च राजनीतिक र सैन्यस्तरमा भएका वार्तापछि मात्र दुई देशबिचको सम्बन्ध केही सहज बनेको हो ।

‘हामीहरू एसियाका दुई पुराना सभ्यता हौं जसले विश्व व्यवस्थामा पुनः आफ्नो स्थान बनाउँदै गएका छौं । त्यसैले हामी सीमामा शान्ति चाहन्छौं,’ जयशंकरले भने । भारत जनसंख्याका हिसाबले विश्वको ठूलोमध्ये एक मुलुक भएको र केही वर्षमै विश्वको दोस्रो वा तेस्रो अर्थतन्त्र बन्न गइरहेको हुँदा उसले चीनसँग सुमधुर सम्बन्ध चाहेको समेत उनको भनाइ थियो ।

त्यसैगरी विदेशमन्त्री जयशंकरले शुक्रबार सम्पन्न भारत, अमेरिका, जापान र अस्ट्रेलियाबिचको क्वाड शिखर वार्ता कुनै पनि मुलुकविरुद्ध नभएको प्रस्ट पारे । चीनले क्वाडलाई ‘मिनी नेटो’ को आरोप लगाउँदै आएको छ । ‘क्वाड कसैको विरुद्ध नभएर केही गर्नका लागि हो,’ जयशंकरले भने ।