ब्राजिल अहिले पनि ननिकै गरी कोरोना महामारीको चपेटामा परिरहेको छ । अमेरिका पछिको कारोना महामारी संक्रमितको संख्या ब्राजिलमा देखा परिरहेको छ । तर आश्चर्य ! सुरुमा मास्कको प्रयोग, प्राथमिक रोकथामका उपाय तथा क्वारेन्टाइनको बिरोध गर्दै आएका ब्राजिलियन राष्ट्रपति जैर बोल्सनारो अहिले पनि यही अभियानमा छन् ।

ब्राजिलमा कोरोना महामारी निकै फैलन थालेपछि त्यहाँको स्थानीय सरकारले लकडाउन घोषणा गरेका छन् । देशमा महामारीको स्थानीय स्तरबाट निकै प्रचार भैरहेको र रोकथामका लागि अनुरोधसहित मापदण्ड पनि सार्वजनिक गरिएका बखत राष्ट्रपति बोल्सनारो लकडाउन विरुद्धमा जनप्रदर्शनको नेतृत्व गरिरहेका छन् । अहिले लकडाउन निवर्तमान राष्ट्रपति लुलाको नारा र लकडाउनको विरोध वर्तमान राष्ट्रपति बोल्सनारोको नारा हुन गएको छ ।

ब्राजिलमा भैरहेको कोरोना राजनीति निकै चर्को रहेको छ । यो एक महामारी भन्दा पनि सत्ताधारी र प्रतिपक्षीको लडाइँको मुद्दा बनिरहेको छ । यसले ब्राजिलियन जनतामा निकै साह्रोगाह्रो अवस्था सिर्जना गरिदिएको छ । जनता आफ्नै जनस्वास्थ्यका विषयमा पनि विभाजित छन् । एकअर्कामा भ्रम छरिरहेका छन् र लडिरहेका छन् ।

यस्तो खालको अवस्था सुरुसुरुमा अमेरिकामा पनि देखिएको थियो । तात्कालीन अमेरिकी राष्ट्रपति ट्रम्प जतिसक्यो कोरोनाको प्रचार तथा यसमा अपनाइनु पर्ने सावधानीका विरुद्धमा थिए । उनी कोरोना अमेरिकामा आउँदैन भन्नेमा ढुक्क थिए । तर यो उनको ढुक्कता छोटो समयमै मनोगत सोचमा परिणत हुन पुग्यो । अमेरिका कोरोना महामारीले ग्रस्त हुन पुग्यो । यसले ठूलो धनजनको क्षति बेहोर्न पुग्यो ।

हाल ट्रम्प सत्ताबाट बाहिरिएपछि राष्ट्रपति जो बाइडनले कोरोना महामारीविरुद्ध करोडौं डलरको राहत स्वास्थ्य अभियान नै सञ्चालन गरिरहेका छन् । तर ब्राजिलमा भने त्यहाँका राष्ट्रपति बोल्सनारो आफैले हरेक दिन स्थानीय सरकारबाट गरिएको लकडाउनको धज्जी उडाउँदै जुलुस र रयालीको नेतृत्व गरिरहेका छन् ।