काठमाडौँ/

रोटरी इण्टरनेशनल क्लवले राजधानी काठमाडौँमा ‘रोटा आर्ट मेला’ सम्पन्न गरेको छ । रोटरी इण्टरनेशनल नवौं जोन, जिल्ला ३२९२ नेपाल-भुटानले सो आर्ट मेला सम्पन्न गरेको हो । पिपुल्स क्याम्पस तथा विद्यालय स्तरका विद्यार्थीहरुलाई लक्षित गरेर क्लवले आर्ट मेला अन्तर्गत हस्तकलाद्वारा गरिने पेंटिंगको प्रतियोगितात्मक कार्यक्रम सम्पन्न गरेको हो ।

रोटरी इण्टरनेशनल नवौं जोन ३२९२ जिल्लाको आयोजनामा सो आर्ट मेला भएको थियो । आयोजित कार्यक्रममा १६ वर्षमुनि र १६ वर्षमाथिका विद्यार्थीहरुलाई दुई समूहमा विभाजन गरेर प्रतिस्पर्धा गराईएको थियो ।

करिव ५० जना प्रतियोगी विद्यार्थीहरुले सहभागिता जनाएको सो प्रतियोगितामा १६ वर्ष माथिका विद्यार्थीहरुलाई ‘Reflecting Your 2020’ शिर्षकको सेरोफेरोमा रहेर र १६ वर्षमुनिका विद्यार्थीहरुलाई ‘Virtual Learning’  शिर्षकको सेरोफेरोमा रहेर पेंटिंग प्रतियोगितामा प्रतिस्पर्धा गराईएको थियो ।

त्यस्तै सो पेंटिंग आर्ट मेलामा १६ वर्षमाथिका प्रतियोगीलाई पेण्ट तयार गर्न ३ घण्टाको समय र १६ वर्षमुनिका प्रतियोगीलाई पेण्ट तयार गर्न २ घण्टाको समय सिमा निर्धारण गिरिएको थियो।

सो ‘रोटा आर्ट मेला’मा जम्मा ८ जना प्रतियोगीले विभिन्न स्थान प्राप्त गरेका थिए । १६ वर्षमुनिको प्रतिस्पर्धामा दावा लामा (प्रथम मनास्लु पब्लिक स्कूल), सुस्मा कुमारी गुप्ता  द्वितीय, सोनी श्रेष्ठ तृतीय (मनास्लु पब्लिक स्कूल) र सुस्मा श्रेष्ठ  (श्री सरस्वती निकेतन स्कूल) ले सान्त्वना पुरस्कार पाएका थिए ।

१६ वर्ष माथिका विद्यार्थीहरुको सो प्रतियोगितामा आकृती परियार (श्री सरस्वती निकेतन स्कूल) प्रथम, ध्रितिका तिवारी (ट्रिनिटी ई कलेज) द्वितीय, निष्ठा श्रेष्ठ(आईआईएमएस) तृतीय र सुभेक्षा सिंह (पिपुल्स क्याम्पस)ले सान्तना पुरस्कार जितेका थिए । प्रतियोगितामा विजेताहरुमध्य १६ वर्षमाथिका प्रथम हुनेले पुरस्कार स्वरुप प्रमाण-पत्र र मेडल सहित ३ हजार रुपैयाँ, दितीय हुनेले प्रमाण-पत्र र मेडल सहित २ हजार रुपैयाँ, तृतीय हुनेले प्रमाण-पत्र र मेडल सहित  १ हजार रुपैयाँ पाएका थिए भने १६ वर्षमुनिका प्रतियोगीहरुले प्रथम हुनेले प्रमाण-पत्र र मेडल सहित २ हजार रुपैयाँ, द्वितीय हुनेले प्रमाण-पत्र र मेडल सहित १ हजार रुपैयाँ र तृतीय हुनेले प्रमाण-पत्र र मेडल सहित ६०० रुपैयाँ पाएका थिए ।

प्रतियोगितामा सहभागी सवैलाई सहभागिताको प्रमाण-पत्र वितरण गरिएको थियो।  प्रतियोगितामा महेंद्र पुन र ओमप्रकाश पुन निर्णायक रहेका थिए । प्रतियोगिता पछि आयोजित पुरस्कार वितरण समारोहमा आफ्नो मन्तव्य राख्दै निर्णायक महेन्द्र पुनले भने ‘कला  बनाउनु भन्दा कलाको प्रकृयामा आनन्द लिन सक्नु कलाकारको मुख्य गुण हो।’

कार्यक्रम राजधानीको ठमेलस्थित पिपुल्स क्याम्पसमा भएको हो । पुरस्कार वितरण कार्यक्रममा कार्यक्रमकी संयोजक प्रयुषा थिङले सहभागी र प्रायोजक लगायत सवैलाई धन्यवाद व्यक्त गरेकी थिइन् । प्रतियोगिता विजेताहरुलाई पुरस्कार दिन आयोजित पुरस्कार वितरण कार्यक्रम पवन  भुषालले संचालन गरेका थिए ।