काठमाडौं ।  प्रधानमन्त्री केपी शर्मा ओलीले मेलम्चीको पानी काठमाडौंमा ल्याउने काम नेपालका लागि नयाँ सिकाइ र महत्वपूर्ण काम भएको बताउनुभएको छ ।                                                                            मेलम्ची खोलाको पानी काठमाडौंको वाग्मती नदीमा बगाउने कामको उद्घाटन समारोहमा प्रधानमन्त्री ओलीले नेपालमा नयाँ प्रविधिको प्रयोग गरी एक ठाउँको पानी अर्को ठाउँमा पुर्याउने काम भएको बताउनुभयो ।

आफ्नो सबै कपाल कालै हुँदा सुरु भएको योजना आफ्नो सबै कपाल सेतै भएपछि आइपुगेको भन्दै उहाँले लामो समयमा हुन नसकेको काम आफू नेतृत्वको सरकारले गरेको बताउनुभयो । उहाँले कोशीमा बग्ने पानी वाग्मतीमा बग्न थालेको र यो पानी उपत्यकाबासीलाई दिएको भन्दै मेलम्ची प्रभावित क्षेत्रका बासिन्दालाई धन्यवाद दिनुभयो ।

‘यो लड्डु खाने खुशी हो’
प्रधानमन्त्री ओलीले आजको दिन लड्डु खाने किसिमको खुशी भएको बताउनुभयो । काठमाडौंका बासिन्दाले मेलम्ची खोलाको पानी पिउन पाउने कुराको ग्यारेण्टी भएको दिन भन्दै उहाँले अब काठमाडौं बासीले केही समयभित्रै मेलम्चीको पानी प्रयोग गर्न पाउने बताउनुभयो । उहाँले आगामी शिवरात्रिसम्म वाग्मतीमा सफा पानी बग्ने पनि बताउनुभयो ।

यस्तै उहाँले केही परीक्षण सम्पन्न गरेर चाँडै काठमाडौं उपत्यकामा मेलम्चीको पानी वितरण गर्ने बताउनुभयो । पानी काठमाडौं ल्याउने तथा वितरणको क्रममा कुनै दुर्घटना हुन नदिइ काम गरेर केही समयमै पानी वितरण हुने उहाँको भनाइ छ । त्यसपछि काठमाडौंबासीले पानीको हाहाकार भोग्नु नपर्ने पनि प्रधानमन्त्री ओलीले बताउनुभयो ।

प्रधानमन्त्री ओलीले आफूहरुले काममा मात्रै ध्यान दिएकोले अहिलेसम्मकै धेरै उपलब्धीहरु प्राप्त भएको बताउनुभयो ।