काठमाडौं । अमेरिकी जो बाइडन प्रशासनले साउदी पत्रकार जमाल खसोग्जीको हत्या प्रकरणमा साउदी राजकुमार मोहमद बिन सलमानलाई हत्याको आदेश दिएको भनी दोषी करार गरेको छ । अमेरिकाको इन्टेलिजेन्स रिपोर्टअनुसार युवराज सलमानको आदेशमा टर्कीस्थित साउदी दूतावासबाट खसोग्जीको अपहरण भएको थियो ।

अपहरण र हत्यामा दोषी पाइएका युवराजप्रति वर्तमान अमेरिकी राष्ट्रपति बाइडन नरम भएको भनेर अमेरिकी सञ्चार माध्यममा कडा टिप्पणी आउन थालेपछि बाइडन प्रशासनले मुख खोलेको हो । बाइडनका अनुसार साउदी राजकुमारको पत्रकार खसोग्जी हत्याप्रकरणमा देखिएको संलग्नतालाई लिएर त्यति साह्रो कडा भइहाल्न अमेरिकालाई गाह्रो पर्ने भएको छ । आफ्नो सदिऔं देखिको मित्रता तोड्न अमेरिकालाई केही गाह्रो भएको कुरातिर बाइडनको संकेत रहेको छ ।

तर अमेरिकाले साउदी राजकुमारको वरिपरि रहेको सुरक्षा सञ्जाल तत्काल भंग गर्न भने साउदी सरकारसँग कुराकानी गर्ने भएको छ ।

यही विषयसँग जोडिएको राजकुमारको सल्लाहकार टिमलाई पनि भंग गराउन अमेरिकाले कुरा उठाउने भएको छ ।

राष्ट्रपति बाइडनले भनेका कुरा निवर्तमान राष्ट्रपति ट्रम्पका पालामा नै अनुसन्धान विभागले फैसला गरिसकेको थियो । तर ट्रम्पले यसलाई अघि बढाएका थिएनन् । उनले यसै विषयलाई लिएर साउदी सरकारसँग संझौता गरी ठूलो परिमाणमा हतियार बिक्रि गरेका थिए । यो विषयलाई लिएर तात्कालीन राष्ट्रपतिको समेत् ठूलो आलोचना भएको थियो ।

हाल भर्खरै जिम्मेवारी लिएका राष्ट्रपति बाइडनका लागि यो सुरुमै ‘कबाबमा हड्डी’ साबित हुन गएको छ । तर पनि बाइडन भने निवर्तमान राष्ट्रपति ट्रम्पको तुलनामा एक स्टेप अघि बढिसकेका छन् । उनले यत्तिमात्र भनेका छन्- ‘मैले जे कुरा गरे यसमा केही थपथाप त होला, तर नयाँ घोषणा भने अरु केही हुने छैन ।’

पत्रकार खसोग्जी वासिंगटन पोष्टका विचार पृष्ठका एक स्तम्भकार थिए । खसोग्जी साउदी राजपरिवारका कट्टर आलोचकका रुपमा चिनिन्थे । उनी सन् २०१८ मा टर्कीको स्तानबुलस्थित साउदी राजदूताबासबाट गायब पारिएका थिए । तर साउदी सरकारले आफू र राजपरिवारको यसमा संलग्नता रहेको भन्ने आरोप अस्वीकार र खण्डन गर्दै आएको छ । अमेरिकी प्रशासन भने खसोग्जीको हत्या प्रकरण एक निकृष्ट र अमानवीय कदम भएको बताउँदै आएको छ ।

हाल अमेरिकाले खसोग्जीको हत्यामा आरोपितहरुका लागि अमेरिकी भिसामा प्रतिबन्ध लगाएको छ । यसमा साउदी अरबका भूतपूर्व अनुसन्धान प्रमुख पनि रहेका छन् ।