काठमाडौँ, प्रधानमन्त्री केपी शर्मा ओली आज पुनः गृहजिल्ला झापा जाँदै छन् । आइतबार मात्रै प्रधानमन्त्री ओली नेपाल–चीन मैत्री औद्योगिक पार्क शिलान्यास गरेर फर्किएका थिए ।

झापाकाे विर्तामोडमा निर्माण भएकाे पूर्वाञ्चल क्यान्सर अस्पतालको उदघाटन गर्न प्रधानमन्त्री ओली मंगलबार झापा जान लागेको उनको सचिवालयले जनाएको छ ।
दुर्गा प्रसाईंले सञ्चालनमा ल्याएकाे पूर्वाञ्चल क्यान्सर अस्पताल ३०० शैय्या क्षमताको रहेकाे छ ।

मंगलबार नै प्रधानमन्त्री ओलीले झापाकाे बिर्तामोडमा निर्माण गरिएकाे विपन्न परिवारका एकीकृत वस्तीकाे पनि उदघाटन गर्ने कार्यक्रम रहेकाे छ । उक्त वस्तीमा निर्मित घर ३५ वटा विपन्न परिवारलाई हस्तान्तरण गर्ने कार्यक्रम रहेकाे छ ।

पछिल्लाे समय प्रधानमन्त्री ओली शिलान्यास तथा उद्घाटनका लागि विभिन्न क्षेत्र धाउनमा व्यस्त छन् । सोमबार मात्रै प्रधानमन्त्री ओली पोखराका विभिन्न कार्यक्रममा सहभागी भएर फर्किएका थिए ।