काठमाडौं । कोरोना महामारीको बहानामा निजी विद्यालयहरुले मनपरी शुल्क उठाइरहेको कुरा आइरहेका बेला क्रान्तिकारी माओवादी निकट विद्यार्थी संगठन अखिल क्रान्तिकारीले त्यसरी मनपरी शुल्क उठाउने विद्यालयहरुलाई कारबाही गर्ने चेतावनी दिएको छ ।

सो संगठनले महामारीको नाममा विद्यालयमा कार्यरत कर्मचारीलाई रोजगारीबाट निष्काशन गर्ने र तलब सुविधा नदिने कार्यको पनि विरोध जनाएको छ । त्यसरी हटाइएका कर्मचारीलाई तत्काल पुनर्वहाली गर्नुपर्ने पनि सो संगठनले माग गरेको छ ।

यसैबीच विभिन्न विश्वविद्यालयले कोरोनाकै बहानामा देखाएर शुल्क वृद्धि गरिरहेका र सिटीइभिटीले शुल्क निर्धारण नगर्दै मनपरी शुल्क उठाइरहेको प्रति पनि सो संगठनले विरोध जनाएको छ । त्यसरी उठाइएको शुल्क फिर्ता गरिनु पर्ने माग पनि सो संगठनले गरेको छ । सो संगठनका अध्यक्ष हरिकृष्ण गजुरेलद्धारा आज जारी विज्ञप्तिमा यस्तो कुराको जानकारी दिइएको छ ।