भारत । भारतको मध्य प्रदेश राज्यको सिधी जिल्लामा मंगलबार एक बस दुर्घटना हुँदा कम्तीमा ४० यात्रुको मृत्यु भएको छ ।                                                    भारतीय सञ्चारमाध्यमहरुका अनुसार सिधीबाट सतना गइरहेको बस मध्य प्रदेशको राजधानी भोपालबाट करिब ५ सय ६० किलोमिटर टाढा रामपुर नैकिनमा बिहान करिब आठ बजे पुलबाट तल वाणसागर परियोजनाको नहरमा खसेको थियो । सडकमा साइड लगाउने क्रममा बस पुलबाट तल नहरमा खसेको बताइएको छ ।
बसमा ५० जना यात्रु रहेको भारतीय सञ्चारमाध्यमहरुले जनाएका छन् । बसमा सवार मध्ये अधिकाँश नर्सिङ अध्ययन गरिरहेका छात्र– छात्रा रहेको र उनीहरु परीक्षामा सहभागी हुन गइरहेको बताइएको छ । मध्य प्रदेश सरकार जनसम्पर्क विभागका अनुसार हालसम्म नहरबाट ४० जनाको शव निकालिएको छ । नहरमा खसेका सात जना यात्रुहरु भने पौडेर बाँच्न सफल भएका छन् । अझै पनि केही यात्रु हराइरहेको र तिनीहरुको खोजी कार्य जारी रहेको भारतीय सञ्चारमाध्यमहरुले जनाएका छन् । दुर्घटनाको खबरसँगै राज्य सरकारले मंगलबारका लागि निर्धारित सबै महत्वपूर्ण कार्यक्रमहरु रद्द गरेको छ ।