काठमाडौं । भारतीय उत्तरपूर्वी राज्य त्रिपुराका मुख्यमन्त्री विप्लव देवले भारतका केन्द्रीय गृहमन्त्री अमित शाहले नेपाल र श्रीलंकामा पनि भाजपा विस्तार गर्ने योजना बनाएको बताएका छन् ।

गत शनिबार त्रिपुरा गएका भारतीय जनता पार्टीका पूर्वअध्यक्ष समेत रहेका शाहले पार्टी बैठकमा भारतका सबै राज्यहरूमा भाजपाको सरकार बनाइसकेपछि नेपाल र श्रीलंकामा पनि भाजपा विस्तार गरेर त्यहाँ पनि बिजेपीको सरकार बनाउन चाहेको बताएको देवको भनाइ छ ।

‘हामी स्टेट गेस्ट हाउसमा कुरा गरिरहेका थियौं । उत्तरपूर्वी क्षेत्रका पार्टी सचिव अजय जमवालले भारतका धेरै राज्यमा बिजेपीले सरकार बनाएको बताउनु भयो, शाहले अब नेपाल र श्रीलंका बाँकी रहेको जवाफ दिनुभयो,’ देवको भनाइ उद्धृत गर्दै इस्ट मोजोले लेखेको छ,‘हामीले बिजेपीलाई नेपाल र श्रीलंकमा पनि विस्तार गर्नुपर्छ र सरकार गठन गर्न जित हासिल गर्नुपर्छ भन्ने उहाँको भनाइ थियो ।’

शाहको तारिफ गर्दै मुख्यमन्त्री देवले उनकै नेतृत्वमा बिजेपी संसारकै ठूलो पार्टी बनेको बताए । आफूहरूलाई संसारकै पार्टी भन्ने कम्युनिष्टहरूलाई पनि बिजेपीले पछि पारेको उनको भनाइ थियो । विपक्षी पार्टीहरूले बिजेपीको बैठकमा अमित शाहले मुख्यमन्त्री देवले भनेजस्तै कुरा बोलेका हुन् भने के भन्न खोजेका हुन् भनेर स्पष्ट पार्नु पर्ने बताएका छन् ।

भारतीय कम्युनिष्ट पार्टी (माक्र्सवादी) का नेता एंव पूर्वसांसद जितेन्द्र चौधरीले मुख्यमन्त्री देवलाई संविधान र प्रजातन्त्रको कुनै ज्ञान नभएको उल्लेख गर्दै उनले भनेजस्तै कुरा शाहले भनेका हुन भने त्यो विदेशी मुलुकको आन्तरिक मामलामा भारतको हस्तक्षेप हुने बताए ।

उनले भारतका गृहमन्त्री शाह नेपाल विरूद्धको षडयन्त्रमा संलग्न रहेको र त्यो कुराको प्रमाण त्रिपुराको संवैधानिक पदमा रहेका व्यक्तिले नै दिएको बताएका छन् । उनले देवको भनाइलाई सामान्य रूपमा लिन नसकिने भएकाले यसको जवाफ बिजेपी र भारतीय प्रधानमन्त्री नरेन्द्र मोदीले दिनुपर्ने बताए ।

त्रिपुरा कंग्रेसका उपाध्यक्ष तपस देले अमित शाहको भनाइ भारतले थुप्रै वर्ष लडेको उपनिवेशजस्तै भएको बताए । उनले नेपाल र श्रीलंकाको सार्वभौम मामलामा भारतले हस्तक्षेप गर्न नसक्ने बताए ।