२४ माघ, काठमाडौं । कोभिड–१९ संक्रमण तथा जोखिमका कारण त्रिभुवन विश्वविद्यालय (त्रिवि)को शैक्षिक सत्र तीन महिना लम्बिने भएको छ । स्नातकको फागुन र स्नातकोत्तर तहको बैशाख महिनासम्म लम्बिने भएको हो ।

त्रिविका विभिन्न संकायका डिनहरूको संयुक्त बैठकको निर्णयअनुसार महामारीका कारण स्नातक र स्नातकोत्तर तहको शैक्षिक सत्र बैशाख महिनासम्म सार्ने निर्णय गरिएको छ । उक्त निर्णयअनुसार स्नातक तहको शैक्षिक सत्र फागुन र स्नातकोत्तर तह शैक्षिक सत्र बैशाख महिनासम्म सार्ने निर्णय गरिएको हो ।

विश्वविद्यालयका शिक्षाध्यक्ष शिवप्रसाद भुसालका अनुसार स्नातक तहको फागुन महिनाबाट शैक्षिक सत्र सुरु गरिने भएको छ भने स्नातकोत्तर तहको बैशाख महिनाबाट सुरु गरिने छ । यी दुवै तहको नयाँ शैक्षिक क्यालेण्डर तयार गरी तत्काल सार्वजनिक शिक्षाध्यक्ष गरिने भुसालले बताए ।

कोभिड–१९ को महामारीका कारण झन्डै तीन महिनापछि शैक्षिक सत्र सार्नु परेको त्रिविले जनाएको छ । महामारीकै जोखिमका कारण विश्वविद्यालयको पठनपाठन र परीक्षा झन्डै १० महिनासम्म बन्द गरिएको थियो । उक्त बन्दको प्रभावका कारण विभिन्न तहका परीक्षा आजसम्म पनि सम्पन्न भएका छैनन् ।

गत शैक्षिक सत्र (२०७६)का परीक्षाहरू बल्ल सुरु गरिएको छ । स्नातक र स्नातकोत्तर तहका परीक्षा यतिबेला सञ्चालन गरिएको बताइएको छ । तथापि त्रिवि, त्रिविद्धारा सम्बन्धनप्राप्त र आंगिक क्याम्पसमा फागुन महिनालाई नै आधार मानी नयाँ भर्नाका सुरु गरिएको शिक्षाध्यक्ष शिवप्रसाद भुसालले बताए ।

विश्वविद्यालयले विद्यार्थीको भविष्यलाई मध्येनजर गर्दै फागुनदेखि कक्षा सञ्चालन गर्ने भएको छ । स्नातक तहको कक्षा फागुन तेस्रो साताबाट सञ्चालन गरिने भएको छ भने स्नातकोत्तर तहको कक्षा बैशाखबाट सुरु गरिने भएको छ । यसका लागि चैत महिनाभित्रै भर्ना र प्रवेश परीक्षा सक्नुपर्ने त्रिविले बताएको छ ।

स्नातक तहको परीक्षा अब पुसमा हुने भएको छ । तथापि परीक्षा सम्पन्न भएको तीन महिनाभित्रै परीक्षाफल सार्बजनिक गर्ने भएको छ । यस बारेमा नयाँ शैक्षिक क्यालेन्डर विश्वविद्यालयले प्रकाशित गरिसकेको छ ।

त्रिविमा झन्डै ५ लाखभन्दा बढी विद्यार्थी अध्ययन गर्छन् । यसअघि स्नातक तहको नयाँ शैक्षिक सत्र मंसिर महिनाबाट सुरु हुने त्रिविको नियममा उल्लेख गरिएको छ ।