☰
काठमाडौँ। निवर्तमान अमेरिकी राष्ट्रपति डोनाल्ड ट्रम्प राज्यबाट पाउने गोप्य सूचनाबाट बञ्चित हुने भएका छन् । हरेक निवर्तमान राष्ट्रपतिले पाउँदै आएको यो अधिकारबाट बञ्चित हुने ट्रम्प पहिलो अमेरिकी राष्ट्रपति हुन् । निवर्तमान राष्ट्रपतिलाई अमेरिकामा विशेष सुविधा दिइनुका साथै राज्यका गोप्य कुरा पनि शेयर गरी सुझाव माग्ने परम्परा रहिआएको छ । निवर्तमान राष्ट्रपतिलाई ‘क्लासिफाइड इन्टेलिजेन्स ब्रिफिङ’ का रुपमा यस्तो गोप्य रिपोर्ट दिने गरिदै आएको हो ।
वर्तमान राष्ट्रपति जो बाइडनले ट्रम्पलाई यो अधिकार नहुने बताएका छन् । अमेरिकी समाजमा विभाजन ल्याउन ट्रम्पले आफ्नो अभियान राष्ट्रपति भवन छोडेदेखि बल्ल सुरु भएको भन्ने अभिव्यक्ति दिएपछि अमेरिकी आन्तरिक मामलामा यो सुरक्षा चिन्ताको विषय बनेको छ । यसैलाई मध्यनजर गरी वर्तमान अमेरिकी राष्ट्रपति जो बाइडेनले शुक्रबार यो अधिकारबाट ट्रम्प सुसूचित हुन नपाउने कुरा पुष्टि गरिसकेका छन् ।
ह्वाइट हाउसले गर्ने एउटा शिष्टाचार अधिकारका रुपमा निवर्तमान राष्ट्रपतिलाई राज्यका गोप्य सूचना जानकारी गराउने र सुझाव माग्ने रहेको छ । तर ट्रम्पलाई भने यो शिष्टाचार अधिकारबाट बञ्चित गरिने पक्का भएको छ । देशलाई विभाजनको बाटोमा डोर्याउन प्रतिबद्ध ट्रम्पका लागि ‘राज्यको गोप्य जानकारीको कुनै अर्थ नभएको’ भन्दै बाइडेनले सार्वजनिक अभिव्यक्ति दिइसकेका छन् ।
ह्वाइट हाउस प्रेस सेक्रेटरी जेन साकीले बाइडेनलाई अन्तर्वार्ताको क्रममा ‘खासमा तपाईंलाई के कुराको चाहिँ चिन्ता छ ?’ भनी प्रश्न गर्दा बाइडनले भनेका थिए– ‘मेरो चाहना छैन कि यसबारे अरु कसैले अनावश्यक अनुमान लगाऊन्, बरु मैले चाहन्छु कि ट्रम्पले यस्तो प्रकारको कुनै पनि गोप्य जानकारी प्राप्त नगरुन् ।’
यसलाई स्पष्ट पार्दै बाइडनले थपेका थिए– ‘मैले यतिमात्र सोच्छु कि ट्रम्पलाई कुनै पनि प्रकारको इन्टेलिजेन्स ब्रिफिङ जरुरी छैन ।’ प्रश्नोत्तरको क्रममा जेन साकीले यो कुरालाई थप स्पष्ट पार्ने क्रममा सोधेको प्रश्नको जवाफमा बाइडनले गम्भीरताका साथ भने– ‘कुनै जानकारी दिनुले उनलाई के अर्थ राख्छ र ? गम्भीर वास्तविकताको ख्याल नै नगरी जे मन लाग्छ, त्यहि बोल्छन् उनी ।’
ट्रम्पलाई गोप्य जानकारी दिने नदिनेबारे अहिले चर्चाको विषय बनिरहेको छ, ह्वाइट हाउसमा । यो विषय चर्चामा आइरहँदा डेमोक्र्याट र केही रिपब्लिकन सांसद तथा प्रशासनका कर्मचारीले ट्रम्पलाई यो सुविधाबाट बञ्चित नगरिनु नै राम्रो रहेको सुझाव दिइरहेका छन् ।
