☰
१६ माघ, काठमाडौं । १२ कक्षाको परीक्षाफल केही दिनमै सार्वजनिक गर्ने राष्ट्रिय परीक्षा बोर्डले तयारी गरेको छ ।
कोभिड–१९ को संक्रमण तथा उच्च जोखिमका कारण विद्यार्थीको पायक पर्ने क्याम्पस वा विद्यालय अर्थात् होम सेन्टरबाट नै परीक्षा लिएको बोर्डले अबको केही दिनमै नतिजा सार्वजनिक गर्ने तयारी पूरा गरेको हो ।
महामारीका कारण १२ कक्षाको परीक्षा मंसिर ९ गतेबाट सुरु भई १६ गते सम्पन्न भएको थियो । परीक्षा सम्पन्न भएको केही दिनमै राष्ट्रिय परीक्षा बोर्डले एक महिनाभित्रै परीक्षाफल सार्वजनिक गर्ने बताएको थियो ।
गत पुस दोस्रो साता अर्थात् एक महिनाभित्रै प्रकाशन गर्ने यसअघि नै बोर्डले जनाइ सकेको थियो । तर, उसले तीन महिना बित्नै लाग्दा पनि सार्वजनिक गर्न सकेको छैन ।
तत्काल नयाँ शैक्षिक सत्र सुरु हुने भएकोले यसको प्रत्यक्ष मार विद्यार्थीमा पर्ने देखिन्छ । तथापि परीक्षाफल एक महिनाभित्रै प्रकाशन गर्ने तयारी गरिए पनि प्राविधिक कारण देखाउँदै ढिलाइ भएको राष्ट्रिय परीक्षा बोर्डले जनाएको छ ।
भौगोलिक विकटता र कोभिड–१९ को संक्रमणका कारण भनेको समयमा परीक्षाफल सर्वजनिक गर्न नसकिएको बोर्डले स्वीकारेको छ ।
बोर्डका अध्यक्ष प्रा.डा. चन्द्रमणि पौडेल भन्छन्, –‘हामी अबको केही दिनमै परीक्षाफल सार्वजनिक गर्ने तयारीमा छौँ, उच्च शिक्षा अध्ययनका लागि विद्यार्थीहरूको बाटो खुल्ने छ र उनीहरूले उच्च शिक्षाका लागि अध्ययन गर्न पनि पाउने भएकाले लगत्तै नतिजा सार्वजनिक गर्नेछौँ ।’
परीक्षाफल सार्वजनिक गर्नका लागि उत्तरपुस्तिका जाँचको कार्य सबै सकिएको बोर्डले बताएको छ । बोर्डका अध्यक्ष पौडेलका अनुसार ७७ वटै जिल्लाका उत्तरपुस्तिका जाँच्ने कार्य सम्पन्न भएको छ । उत्तरपुस्तिका परीक्षण कार्य सकिए पनि प्राप्ताङ्क विवरण अर्थात् नम्बर इन्ट्री गर्ने कार्य ढिलाइ भएकोले परीक्षाफल सार्वजनिक हुन ढिलाइ भएको हो ।
यसका लागि देशैभरका शिक्षकले उत्तरपुस्तिका परीक्षण गरी प्राप्ताङ्क विवरण पठाइ सकेका छन् । यसर्थ परीक्षाफल केही दिनमै प्रकाशित गरिने बोर्डले जनाएको छ । शिक्षकले पठाएको प्राप्ताङ्क चढाउने र परीक्षाफल प्रकाशनको तयारी सबै पूरा भएको बताइएको छ ।
परीक्षाको समयमा कोभिड–१९ को संक्रमणका कारण परीक्षा दिनबाट बञ्चित भएका विद्यार्थीहरूका लागि पनि राष्ट्रिय परीक्षा बोर्डले पुनः परीक्षा दिन सक्ने निर्णय गरेको थियो । बोर्डले गरेको निर्णयसँगै संक्रमित विद्यार्थीहरूले पनि परीक्षा दिएका छन् । उनीहरूको नतिजा पनि केही दिनमै सार्वजनिक गरिने भएको छ ।
कोभिड–१९ संक्रमिण भएका विदार्थीहरूले अन्य विद्यार्थीहरूलाई पनि संक्रमित गर्ने सम्भावना भएकोले संक्रमित विद्यार्थीका लागि पुनः परीक्षा दिन सक्ने भन्दै बोर्डले सूचना प्रकाशित गरेको थियो । उक्त सुचनाको आधारमा संक्रमित विद्यार्थीहरूले पनि परीक्षा दिएका छन् ।
ढिला नगरी परीक्षाफल सार्वजनिक गरेमा विद्यार्थीहरूको शैक्षिक सत्र खेर नजाने र उच्च शिक्षामा अध्ययन गर्ने अवसर पाउने बताइएको छ । यसका लागि विश्वविद्यालयहरूसँग छलफल र समन्वय गरिएको छैन । तथापि यस विषयमा शिक्षा विज्ञान तथा प्रविधि मन्त्रालयलाई अनुरोध भने गरिएको बोर्डले जनाएको छ ।
परीक्षामा चार लाखभन्दा बढी विद्यार्थी प्रत्यक्षरूपमै परीक्षामा सहभागी भएका थिए । देशभरबाट परीक्षामा नियमित र आंशिक गरी ४ लाख ३ हजार १ सय ८० विद्यार्थी ससहभागी भएका छन् । देशैभर ४ हजार १ सय ५० वटा परीक्षा केन्द्र तोकिएको थियो ।
कक्षा १२ को परीक्षामा विद्यार्थीको कक्षा ११ को ४० प्रतिशत मूल्याङ्कनलाई पनि जोडिने भएको छ । कक्षा १२ को ४० प्रतिशत लिखित परीक्षा र विद्यालयले लिने आन्तरिक मूल्यांकनको २० प्रतिशतका आधारमा विद्यार्थीको मूल्याङ्कन गरिने भएको छ ।
