☰
१५ माघ, कीर्तिपुर । त्रिभुवन विश्वविद्यालय (त्रिवि)ले आंशिक प्राध्यापकहरूलाई करार नियुक्ति दिने भएको छ । त्रिविद्धारा सम्बन्धनप्राप्त र आंगिक क्याम्पसमा कार्यरत आंशिक प्राध्यापकहरूलाई आन्तरिक स्रोतबाट पारिश्रमिक दिने गरी नियुक्त गर्न लागेको त्रिविले जनाएको छ ।
आंशिक प्राध्यापक संघसँग गरेको सहमति कार्यान्वयनका लागि करार सरहको पारिश्रमिक पाउने गरी व्यवस्थापन र नियुक्तिको प्रक्रिया सुरु गरिएको छ ।
त्रिवि कार्यकारी परिषद्को माघ २ गते बसेको बैठकको निर्णयअनुसार रजिष्ट्रार कार्यालयका प्रमुख बैकुण्ठप्रसाद थपलियाले सोमबार त्रिविद्धारा सम्बन्धनप्राप्त र आंगिक क्याम्पसमा कार्यरत आंशिक शिक्षकको व्यवस्थापनबारे सर्कुलर पठाएको जनाएका छन् ।
आंशिक प्राध्यापक अध्यापनरत सम्बद्ध क्याम्पसको आन्तरिक स्रोतबाटै पारिश्रमिक (तलब) पाउने गरी व्यवस्थापनका लागि सूची पठाउन त्रिविले निर्देश गरिसकेको छ । गत पुष २४ गते आंशिक प्राध्यापक संघ र विश्वविद्यालयबीच ७ बुँदे सहमतिसँगै आन्दोलनका कार्यक्रम फिर्ता गरिएको थियो ।
उक्त सहमतिमा त्रिवि वा त्रिविद्धारा सम्बन्धनप्राप्त, आंगिक क्याम्पसमा कार्यरत प्राध्यापकले कम्तीमा एक शैक्षिक सत्र पूरा गरेको हुनुपर्ने, ज्येष्ठता, अनुभव र कक्षाभारका आधारमा आंशिक प्राध्यापकमा नियुक्ति दिने प्रक्रिया सुरु गर्ने भएको छ ।
यसरी नियुक्त गरिएका प्राध्यापकले त्रिवि र क्याम्पसको आन्तरिक स्रोतबाट पारिश्रमिक (तलब) पाउने गरी व्यवस्थापन गरिने भएको छ । ती प्राध्यापकले त्रिविको प्राज्ञिक अध्ययन तथा अनुसन्धानमा पनि समावेश हुन पाउने निर्णय भएको हो ।
यसरी शैक्षिक सत्र अध्यापन पूरा गरेका आंशिक प्राध्यापकलाई त्रिवि सेवा आयोगमा प्रवेश गर्नका लागि उमेरको कुनै पनि हदबन्दी नलाग्ने गरी नियमको संशोधनसमेत गरिएको छ । हाल त्रिविमा झन्डै दुईभन्दा बढी आंशिक प्राध्यापक अध्यापनरत छन् ।
संघका महासचिव राजेन्द्र गिरीले विगतका सरकार र नेतृत्वसँग भएका सहमति कार्यान्वयन नभएकामा हालको सहमति कार्यान्वयन सुरु हुनु सकारात्मक भएको बताए । आफूहरु समान कामका लागि समान ज्यालाका लागि लडेकामा त्यसको प्रतिफल प्राप्त हुने आशा बढेको बताए ।
आंशिक प्राध्यापकहरूले बौद्धिक शोषण भएको भन्दै २०६३ सालदेखि आन्दोलन सुरु गरेका थिए । तथापि आन्दोलन सुरु गरेको झन्डै १५ वर्ष बित्दा पनि उनीहरूको माग सम्बोधन गरिएको छैन ।
यसपटक त्रिविले आफूहरूको उचित मागको सम्बोधन गर्ने कुरामा आशावादी भएको संघका प्रवक्ता मोहन घिमिरेले बताए ।
१५ वर्ष यताको माग भनेकै एक शैक्षिक सत्र पूरा गरेका सम्पूर्ण आंशिक प्राध्यापकलाई करार गर्नुपर्ने आंशिक प्राध्यापक संघका संरक्षक शशिकुमार शर्माले बताए । संरक्षक शर्माले लामो समय यता आन्दोलन जारी रहेको र सो समायावधिमा सम्झौता भए पनि कार्यान्वयन नभएको गुनासो गरे । यद्यपि आफ्ना माग यसपटक पूरा हुनेमा आफू ढुक्क रहेको संरक्षक शर्मा बताउँछन् ।
त्रिविद्धारा सम्बन्धन प्राप्त एवम् आंगिक क्याम्पसका आंशिक प्राध्यापकहरूसँग सम्झौता भए पनि कार्यान्वयन नगर्ने प्रवृत्तिका कारण आन्दोलन, धर्नामा बाध्य भएर बस्नु परेको आंशिक प्राध्यापक संघका प्रवक्ता मोहन घिमिरेले बताए । त्यस्तै उक्त संघका महासचिव राजेन्द्र गिरीले लामो समयदेखि प्राध्यापक आन्दोलित भए पनि समस्या समाधानका लागि त्रिविले कुनै चासो नदेखाएको बताए ।
तथापि यसपटक भने आफ्ना माग सम्बोधन हुनेमा ढुक्क रहेको महासचिव गिरीको दाबी छ । गिरीकाअनुसार ९० प्रतिशत बढी कक्षाभार आंशिक प्राध्यापकले नै लिनु परेको छ ।
आंशिक प्राध्यापक संघले त्रिभुवन विश्वविद्यालयले ल्याएको निर्देशिका खारेज गर्नुपर्ने, प्राज्ञिक उन्नयनको ग्यारेन्टी गर्नुपर्ने, करार नियुक्ति गर्नुपर्ने लगायतका माग राखेको छ । प्राध्यापकहरू एक सातादेखि त्रिवि परिसरमा धर्नामा बसेका छन् । यद्यपि आफूहरूको माग सम्बोधन नभएसम्म आन्दोलन नरोक्ने उनीहरूको अडान छ ।
