चीनले सन् २०२० मा सबैभन्दा धेरै प्रत्यक्ष वैदेशिक लगानी (एफडिआई) भित्र्याएको छ । संयुक्त राष्ट्रसंघीय संस्था युएनसिटिएडीले आइतबार सार्वजनिक गरेको रिपोर्टअनुसार चीनमा गत वर्ष १६३ अर्ब अमेरिकी डलर एफडिआई आएको छ । अमेरिकामा भने बाहिरका लगानीकर्ताले १३४ अर्ब डलर लगानी गरेका छन् ।

सन् २०१९ मा अमेरिकाले २५१ अर्ब डलर वैदेशिक लगानी भित्र्याएको थियो भने चीनमा १४० अर्ब डलरमात्र आएको थियो । चिनियाँ अर्थतन्त्रले आर्थिक वर्षको चौंथो त्रैमासमा राम्रो गति समातेको थियो । त्यही प्रगतिका कारण पहिलो त्रैमासमा खुम्चिएको चिनियाँ अर्थतन्त्रले गत वर्ष २.३ प्रतिशतको आर्थिक वृद्धिदर हासिल गरेको थियो ।

योसँगै चीन संसारभरि कोरोना महामारी फैलिएका बेला सन् २०२० मा सकारात्मक आर्थिक वृद्धि गर्ने ठूला अर्थतन्त्रमध्ये एकमात्र राष्ट्र बनेको छ । अमेरिकासँगको व्यापार युद्ध जारी रहेको र सबैभन्दा पहिला कोरोनाभाइरसको महामारी खेपेको चीनले अर्थतन्त्रमा गरेको सुधारले धेरैलाई आश्चार्यमा पारेको छ । गतवर्ष संसारभरिको एफडिआईमा अघिल्लो वर्षभन्दा ४२ प्रतिशतले कमी आएको छ ।

सन् २०१९ मा १५ खर्ब डलर वैदेशिक लगानी भएकोमा गत वर्ष झन्डै ८५९ अर्ब डलरमात्र लगानी भएको छ । सन् २०१९ भन्दा ल्याटिन अमेरिकी र क्यारेबियन मुलुकमा ३७ प्रतिशत, अफ्रिकामा १८ प्रतिशत र एसियाका विकासशील मुलुकमा ४ प्रतिशतले एफडिआई घटेको रिपोर्टमा उल्लेख छ । पूर्वी एसियाली मुलुकमा सन् २०२० को एक तिहाइ वैदेशिक लगानी गएको छ भने विकसित देशमा अघिल्लो वर्षभन्दा ६९ प्रतिशतले घटेको छ ।