वासिङ्टन । अमेरिकी राष्ट्रपति डोनल्ड ट्रम्प सत्ता छोड्ने मानसिकतामा छैनन् । यसैबिच उनका समर्थकहरुले अमेरिकामा हिंसात्मक प्रदर्शन गरेका छन् । अमेरिको क्यापिटल बिल्डिङमा ट्रम्पका समर्थकले गरेको हिंस्रक गतिविधि पश्चात् वासिङ्टन डिसीमा कफ्र्यू लगाइएको छ ।

कफ्र्यू बुधबार बेलुका ६ बजेदेखि बिहीबार बिहानसम्म लागू गरिएको हो । यद्यपि, अब क्यापिटल बिल्डिङ भने सुरक्षित छ । अमेरिकी अधिकारीले यसको जानकारी दिएका छन् । क्यापिटल भवन, संयुक्त राज्यको संसद भवन हो । क्यापिटलभित्र उपस्थित संवाददाताका अनुसार जब सुरक्षाबलका प्रमुखले यसबारे जानकारी दिए तब सांसदले ताली बजाएका थिए ।

ट्रम्पका समर्थकले बुधबार क्यापिटल बिल्डिङमा प्रवेश गरेर हिंसा सुरु गरिदिए । यो हंगामा त्यतिबेला भयो जब अमेरिकी कांग्रेसमा इलेक्टोरल कलेजको विषयमा बहस चलिरहेको तियो । यहाँ जो बाइडेनको चुनावी जीतको पुष्टि गरिने कार्यक्रम पनि थियो ।
सदनमा चलिरहेको बहसका बेला अचानक ट्रम्पका समर्थक क्यापिटल बिल्डिङभित्र पुगे । यसका कारण बहसबिचमा नै रोक्नुपर्यो । ट्रम्पका समर्थकले चुनाव रद्ध गर्ने माग गर्दै प्रदर्शन गरिरहेका थिए । यतिबेला केही प्रदर्शनकारी र प्रहरीबिच हिंस्रक झडप भयो ।

स्थिति अनियन्त्रित भएपछि नेशनल गार्डलाई क्यापिटल पठाइयो । रिपोर्टका अनुसार क्यापिटल बिल्डिङमा एक आगो निभाउने यन्त्र विस्फोट भएको छ भने एक महिलालाई गोली लागेको छ । बीबीसीले ती महिलाबारे कुनै जानकारी नभएको बताएपनि द वासिङ्टन पोष्ट र सीएनएनले भने उनको अस्पतालमा उपचारको क्रममा मृत्यु भएको बताएका छन् ।