काठमाडौं । धारिलो हतियार कैँची प्रहार गरी हत्या गर्ने एक जना पक्राउ परेका छन् । भारत मोतीहारी घर भएका २५ वर्षीय कलाम मियाको कैँची प्रहार गरी हत्या गरेको अभियोगमा भारत मोतीहारी घर भएका २५ वर्षीय सुबोध शर्मालाई बुधवार बिहान प्रहरीले पक्राउ गरेको छ ।

काठमाडौं महानगरपालिका-१६ बाईपास ओरालोस्थित तरुण मा वि नजिक सडक खण्डमा सुबोधले मंगलवार राति कैँची प्रहार गर्दा गम्भीर घाइते भएका कलामको शिक्षण अस्पताल महाराजगञ्जमा उपचारको क्रममा मृत्यु भएको हो ।

कैँची प्रहार गरी फरार रहेका सुबोधलाई काठमाडौं फर्पिङबाट खटिएको प्रहरी टोलीको सहयोगमा बुधबार बिहान नियन्त्रणमा लिएको प्रहरीले जनाएको छ । यस सम्बन्धमा प्रहरीले आवश्यक अनुसन्धान गरिरहेको बताएको छ ।