समाचार टिप्पणी । अमेरिकी राष्ट्रपति डोनाल्ड ट्रम्प र रिपब्लिकन सांसदहरुले राष्ट्रिपतीय निर्वाचनमा भएको हार अस्वीकार गरिरहेका छन् । यसरी अमेरिकामा पनि संसद-युद्ध जारी छ । डेमोक्र्याट पार्टीका जो बाइडन राष्ट्रपतिमा निर्वाचित भएको सार्वजनिक रुपमा स्वीकार गरिए पनि रिपब्लिकन सांसदहरु इलेक्टोरल मत गणनाको पुनः परीक्षणको माग गर्दै आफ्नो अभिमत सार्वजनिक गरिरहेकाले अन्यौलता लम्बिइरहेको हो । यसले सजिलैसँग बाइडनले पदभार सम्हाल्न पाउलान् भन्ने आशामा केही अप्ठेरो अवश्यै ल्याएको छ ।

अर्कोतिर ट्रम्पको निर्वाचन परिणामप्रतिको इमान्दारितामाथि शंका पनि उठिरहेको छ । अमेरिकामा मत खसिसकेपछि भैरहेको पपुलर तथा इलेक्टोरल मत परिणाम उल्ट्याउन ट्रम्पले निर्वाचन अधिकारीहरुलाई ठाडो निर्देशन दिएको कल रेकर्ड एकपछि अर्को गरी सार्वजनिक भैरहेका छन् ।

उक्त कल रेकर्डले लामो समयसम्म रिपब्लिकनको पकडमा रहेको जोर्जिया राज्यमा मत गणना भैरहँदा डेकमोक्र्याट हाबी हुन पुगेपछि मत गणना भैरहेकै बखत ट्रम्पले उच्च निर्वाचन अधिकारीलाई निर्वाचन परिणाम उल्टाउन पर्याप्त मत खोजेर ल्याउन दबाब दिइरहेको देखाएको छ ।

वाशिङ्टन पोष्टद्वारा सार्वजनिक गरिएको कल रेकर्डमा ट्रम्पले जोर्जियाका सेक्रेटरी अफ स्टेट ब्राड रफेन्सपोगरसँग “म मात्र ११,७८० भोट खोज्न चाहन्छु” भनेका थिए । तर रफेन्सपोगरले त्यसको प्रतिउत्तरमा जोर्जियाको नतिजा सही भएको बताइरहेको कल रेकर्डमा सुनिएको बताइएको छ ।

हाल ट्रम्पको रिपब्लिकन पार्टीको बहुमत रहेको अमेरिकी संसदको माथिल्लो सदन सिनेटमा रहेका सांसदहरूले अहिलेसम्म निर्वाचनमा धाँधली भएको भनेर हंगामा मच्चाउने गरिरहेका छन् । उनीहरुले इलेक्टोरल मत पुनः अनुसन्धानका लागि एक शक्तिशाली आयोग नबनाउँदासम्म जो बाइडनको जितलाई अस्वीकार गर्ने बताइरहेका छन् । उक्त समूहका नेता टेड क्रुजले यसको नेतृत्व गरिरहेका छन् ।
अर्कोतिर डेमोक्र्याटको बहुमत भएको तल्लो सदनले ट्रम्पको कार्यकालमै उनको रक्षा खर्चबारे राष्ट्रपतीय भिटोलाई संसदले उल्ट्याइदिएको छ । यस्तो आश्चर्य अमेरिकी इतिहासमा पहिलो पटक भएको छ । यसले संसदमा ट्रम्प र बाइडनका पक्ष-विपक्षमा तानातानको स्थिति ल्याइदिएको छ ।

यसको पछाडिको मूलकारण राष्ट्रपति ट्रम्पले हार स्वीकारेको कुरा सार्वजनिक गरेका छैनन् । बाइडनले देश ‘विभाजित’ नगरौं भन्दा पनि अमेरिकी जनतालाई विभाजित गरेर शासन गर्ने ट्रम्पको चाहना र अभिव्यक्तिले अमेरिकी एकतामा संकटमा पर्न गएको ठानिएको छ । हाल अमेरिकी एकताका लागि जुटिरहेका राजनीतिक विश्लेषकहरु उक्त एकतामा खलल ल्याउने कुनै पनि स्वार्थपूर्ण काम रोक्न सुझाव दिइरहेका छन् ।

(एजेन्सीको सहयोगमा)