१९ पुष, कीर्तिपुर । त्रिभुवन विश्वविद्यालय (त्रिवि)का आंशिक प्राध्यापकहरू विगत १५ वर्षदेखि आन्दोलित भएका छन् । समान कामको समान पारिश्रमिक हुनुपर्ने माग राख्दै उनीहरू आन्दोलित भएका हुन् ।

आंशिक प्राध्यापकहरूले बौद्धिक शोषण भएको भन्दै २०६३ सालदेखि आन्दोलन सुरु गरेका छन् । आन्दोलन सुरु गरेको झन्डै १५ वर्ष पुग्दा पनि उनीहरूको माग सम्बोधन गरिएको छैन ।

१५ वर्ष यताको माग भनेकै एक शैक्षिक सत्र पूरा गरेका सम्पूर्ण आंशिक प्राध्यापकलाई करार गर्नुपर्ने आंशिक प्राध्यापक संघका संरक्षक शशिकुमार शर्माले बताए । संरक्षक शर्माले लामो समय यता आन्दोलन जारी रहेको र सो समायावधिमा सम्झौता भए पनि कार्यान्वयन नभएको गुनासो गरे । यद्यपि आफ्ना माग पूरा नभएसम्म निरन्तर आन्दोलन गर्ने उनको भनाइ छ ।

त्रिविद्धारा सम्बन्धन प्राप्त एवम् आंगिक क्याम्पसका आंशिक प्राध्यापकहरूसँग सम्झौता भए पनि कार्यान्वयन नगर्ने प्रवृत्तिका कारण आन्दोलन, धर्नामा बाध्य भएर बस्नु परेको आंशिक प्राध्यापक संघका प्रवक्ता मोहन घिमिरेले बताए । त्यस्तै उक्त संघका महासचिव राजेन्द्र गिरीले लामो समयदेखि प्राध्यापक आन्दोलित भए पनि समस्या समाधानका लागि त्रिविले कुनै चासो नदेखाएको बताए ।

महासचिव गिरीका अनुसार ९० प्रतिशत बढी कक्षाभार आंशिक प्राध्यापकले नै लिनु परेको बताए । तथापि आफूहरूले गरेको श्रमअनुसार पारिश्रमिक नभएको उनको गुनासो छ ।

आंशिक प्राध्यापक संघले त्रिभुवन विश्वविद्यालयले ल्याएको निर्देशिका खारेज गर्नुपर्ने, प्राज्ञिक उन्नयनको ग्यारेन्टी गर्नुपर्ने, करार नियुक्ति गर्नुपर्ने लगायतका माग राखेको छ । प्राध्यापकहरू एक सातादेखि त्रिवि परिसरमा धर्नामा बसेका छन् । यद्यपि आफूहरूको माग सम्बोधन नभएसम्म आन्दोलन नरोक्ने उनीहरूको अडान छ ।