काठमाडौं । राजनीतिक दाउपेचका कारण प्रतिनिधिसभा भंग गरिएपनि राष्ट्रिय सभाको बैठक भने आज बस्दैछ । बैठक आज अपराह्न चारबजे बोलाइएको छ । बैठकमा मन्त्रिपरिषद पुनर्गठनबारे जानकारी गराइने छ ।

संसद अधिवेशन नचलेको अवस्थामा बाधा अड्काउ फुकाउबाट भएका चार समिति गठनको आदेश अनुमोदन गर्ने सम्भावित कार्यसूची पनि छ । अधिवेशन नचलेको अवस्थामा सरकारको सिफारिसमा राष्ट्रपतिबाट जारी गरिएका विभिन्न ७ वटा अध्यादेशहरु पनि पेस हुने छन् ।

यसबीचमा संवैधानिक परिषदको काम कर्तव्य र अधिकार सम्बन्धी पहिलो संशोधन अध्यादेश, नेपाल प्रहरी तथा प्रदेश प्रहरीको कार्यसञ्चालन तथा सुपरिवेक्षण सम्बन्धी अध्यादेश, सामाजिक सुरक्षा अध्यादेश, तेजाव तथा अन्य घातक रासायनिक पदार्थको नियमन सम्बन्धी अध्यादेश, औषधि तेस्रो संशोधन अध्यादेश, हिंसाविरुद्ध केही नेपाल ऐन संशोधन अध्यादेश र फौजदारी कसुर तथा फौजदारी कार्यविधि सम्बन्धी अध्यादेश जारी भएका थिए । त्यसपछि आजको बैठकमा दलका नेताहरुले बोल्ने कार्यसूची पनि राखिएको छ ।